ჩაეწერეთ ვიზიტზე მოგვწერეთ ონლაინ phone დაგვირეკეთ

მაგნიტურ რეზონანსული ტომოგრაფია

რას არის მაგნიტურ რეზონანსული ტომოგრაფია (MRI)?

მაგნიტურ რეზონანსული ტომოგრაფია რადიოლოგიური კვლევის ყველაზე ინფორმატიული მეთოდია, რომელიც შინაგანი ორგანოების, ორგანოთა სისტემების და რბილი ქსოვილების დიაგნოსტირებისთვის გამოიყენება. კვლევის აღნიშნული მეთოდი, ორგანიზმის შიგნით არსებული მდგომარეობის დეტალურ გამოსახულებას ქმნის და გამოიყენება როგორც მთლიანი სხეულის გამოსაკვლევად, ასევე მის ცალკეულ უბნებზე: თავისა და ზურგის ტვინი, გულ-სისხლძარღვთა სისტემა, მკერდი, ხერხემალი, ძვალ-სახსროვანი სისტემა, შინაგანი ორგანოები.

რამდენად უსაფრთხოა მაგნიტურ რეზონანსული ტომოგრაფია (MRI)?

კვლევის სხვა მეთოდებისგან განსხვავებით, რომლებიც მაიონიზირებელ გამოსხივებას (რადიაცია) იყენებენ, მაგნიტურ რეზონანსული ტომოგრაფია მაღალი ხარისხის გამოსახულებას ძლიერი მაგნიტური ველისა და რადიოტალღების საშუალებით ქმნის, რაც კვლევის ამ მეთოდს სრულიად უსაფრთხოს ხდის, მათ შორის ჩვილებისა და მცირეწლოვანი ბავშვებისთვის. გაითვალისწინეთ, თუ ორსულად ხართ ან ფიქრობთ, რომ შესაძლოა ორსულად იყოთ, MRI პროცედურის დაწყებამდე აუცილებლად აცნობეთ ამის შესახებ თქვენს ექიმს.

როგორ მოვემზადოთ მაგნიტურ რეზონანსული გამოკვლევისთვის?

მაგნიტურ რეზონანსული ტომოგრაფია წინასწარ მომზადებას არ საჭიროებს. გამონაკლის შემთხვევებში, შესაძლოა თქვენმა ექიმმა მოგცეთ მითითება კვლევის განხორციელების წინ საკვების ან/და სითხის მიღებასთან დაკავშირებით.

რა უნდა გაითვალისწინოთ მაგნიტურ რეზონანსული კვლევისას?


MRI კვლევა სპეციალურ ოთახში ხორციელდება, სადაც ძლიერი მაგნიტური ველია. შესაბამისად, კატეგორიულად დაუშვებელია აღნიშნულ ოთახში ლითონის შემცველი საგნების მოხვედრა. პროცედურის დაწყებამდე, გასახდელ სივრცეში უნდა დატოვოთ ნებისმიერი ლითონის შემცველი ნივთი და ტანისამოსი.


ასეთი ნივთებია: სმენის გასაუმჯობესებელი, ლითონის სამკაულები, საათები, თმის სამაგრები; კალმები, ქაღალდის სამაგრები, გასაღებები, მონეტები; ტანისამოსი, ლითონის დეტალებით: ელვა, ღილი, სამაგრი, კაკვები, ქვედა მავთულები (ბიუსტჰალტერი) ან ლითონის ძაფები, ფეხსაცმელი, ქამრების ბალთები, დამცავი ქინძისთავები. ზოგიერთი კოსმეტიკური საშუალება შეიცავს მცირე რაოდენობით ლითონებს, ამიტომ უმჯობესია არ გაიკეთოთ მაკიაჟი.
აუცილებლად აცნობეთ ექიმს, თუ გაქვთ იმპლანტ(ებ)ი, კარდიოსტიმულატორი, ნებისმიერი ტიპის სტენტ(ებ)ი. 

კვლევის პროცესი

მომზადება

კვლევის პროცესის დაწყებამდე, სპეციალისტის თანხლებით შეავსებთ სპეციალურ კითხვარს. MRI კვლევა დაახლოებით 20 - 60 წუთს გრძელდება, დამოკიდებულია სხეულის გამოსაკვლევ უბანსა და მასაზე. თქვენ წინასწარ გაცნობებენ  თუ რა დრო დასჭირდება გამოკვლევას. იმ შემთხვევაში თუ კვლევის განხორციელება კონტრასტულ (რკინის შემცველი ნივთიერება) ინექციას საჭიროებს, თქვენ შესაძლოა იგრძნოთ კონტრასტის შესვლის მომენტი. კონტრასტული აგენტები არ შეიცავს იოდს, შესაბამისად, ის იშვიათად იწვევს ალერგიულ რეაქციას ან სხვა ტიპის გართულებას.


კვლევა

როგორც კი მზად იქნებით, გადაინაცვლებთ მაგნიტურ-რეზონანსული ტომოგრაფის გვირაბში და დაიწყება კვლევის განხორციელების პროცესი, რომელიც სრულიად უმტკივნეულო პროცედურაა. მაღალი ხარისხის გამოსახულების მისაღებად, სხეულის გამოსაკვლევ უბანზე მოთავსდება სპეციალური გამოსახულების მიმღები მყარი ხვეული (კოილი).  MRI პროცედურას თან ახლავს გარკვეული ხმაური, რომელსაც აპარატი გამოსცემს. ხმაურის დასახშობად, გადმოგეცემათ ყურსასმენები. 

კვლევის მსვლელობისას, თქვენ შესაძლებლობა გექნებათ გაესაუბროთ რადიოგრაფერს, რომელიც კვლევის პროცესში დაგაკვირდებათ. კომუნიკაციას საკონტაქტო ბუშტის მეშვეობით შეძლებთ, რომელიც კვლევის დაწყებამდე გადმოგეცემათ. მიმართეთ მას, თუ გექნებათ რაიმე შეკითხვა ან იგრძნობთ რაიმე უჩვეულოს. იმ შემთხვევაში, თუ გაქვთ დიდი ზომის, ფერადი ტატუ, კვლევის პროცესში სხეულის შესაბამისი უბანზე შესაძლოა გქონდეთ სიცივის ან სიმხურვალის შეგრძნება. მნიშვნელოვანია, რომ კვლევის პროცესში იყოთ მაქსიმალურად მშვიდად და არ იმოძრაოთ. სიმშვიდის შენარჩუნებისთვის უმჯობესია თვალები დახუჭული გქონდეთ.


კვლევის დასასრული

კვლევის დასრულების შემდეგ, თქვენ შეგიძლიათ ჩვეულებრივ განაგრძოთ თქვენი საქმიანობა. თქვენი ჯანმრთელობის მდგომარეობის შესახებ დასკვნას, ექიმი რადიოლოგი, კვლევის დასრულების შემდეგ მოამზადებს. თქვენ წინასწარ გაცნობებენ თუ როდის იქნება მზად რადიოლოგის დასკვნა.